اسرائیل کا ترکی کے خلاف نیٹو میں پروپیگنڈہ، حماس کی شدید مذمت

اسلامی تحریک مزاحمت’’حماس‘‘ نے ترکی  اور جماعت کے ترکی میں مقیم سیاسی شعبے کے رکن صالح العاروری کے خلاف شمالی اوقیا نوس کی تنظیم نیٹو میں شکایت کو مسترد ک ردیا ہے۔ حماس نے واضح کیا ہے کہ اسرائیل ترکی کو بدنام کرنے کے لیے منفی پروپیگنڈہ کر رہا ہے۔

مرکزاطلاعات فلسطین کے مطابق حماس کی جانب سے جاری ایک بیان میں کہا گیا ہے کہ صہیونی ریاست کی جانب سے ترک حکومت اور ترکی میں موجود حماس کے رہ نما صالح العاروری کے خلاف نیٹو میں جو شکایت کی گئی ہےوہ باطل اور جھوٹ کا پلندہ ہے۔ اسرائیل فلسطینیوں کے خلاف اپنے جنگی جرائم پر پردہ ڈالنے کے لیے اس طرح کے حیلے بہانوں کا سہارا لے رہا ہے۔

بیان میں کہا گیا ہے کہ اسرائیل کے خلاف مزاحمتی کارروائیاں حماس کے عسکری ونگ



القسام بریگیڈ کی ذمہ داری ہیں القسام ہی عسکری امور کی نگرانی کر رہا ہے۔ اس کا حماس رہ نما صالح العاروری کے ساتھ کوئی تعلق نہیں ہے۔ العاروری حماس کے سیاسی شعبے کے رکن ہیں۔

خیال رہے کہ حال ہی میں اسرائیل نے نیٹو میں یہ شکایت کی ہے کہ جمہوریہ ترکی نے حماس کے ایک سینیر رہ نما صالح العاروری کو پناہ دے رکھی ہے جو وہاں بیٹھ کراسرائیل میں حملوں کی سازشیں کر رہے ہیں۔ نیٹو ترکی پرحماس رہ نما کو بے دخل کرنے کے لیے دبائو ڈالے۔

صہیونی حکومت کی اس شکایت کے رد عمل میں حماس نے واضح کیا ہے کہ اسرائیل ترکی کے خلاف منفی پروپیگنڈہ کررہا ہے۔ نیٹو میں شکایت کرنے کا مقصد حماس کے خلاف گھیرا تنگ کرنے کی سازش ہے لیکن ترک حکومت صہیونی ریاست کے مطالبے پر عالمی برادری کے دبائو میں نہیں آئے گی۔